Día da Androlla
Incluído no programa de festas do Entroido de Viana do Bolo, o “Domingo Gordo” (día grande da festa), vénse celebrando, dende 1970, a Festa da Androlla, unha das grandes festas gastronómicas de Galiza.
Trátase dun produto referente da gastronomía vianesa e galega, onde miles de persoas se reúnen para gozar deste manxar. A androlla está feita con costela de porco aderezada con pimentón, sal e allo e adoita comerse acompañada de “cachelos” (patacas cocidas) e grelos. E como Galiza é terra de produtos de calidade, os bos viños e licores nunca fallan neste tipo de festas.
Unha xornada que non te podes perder: gastronomía e festa asegurada, xa que ademais se levan a cabo numerosos actos como desfiles de comparsas, charangas e os famosos folións cos Boteiros.
Polo tanto, se queres pasar unha reunión de festa e gastronómica, o día da Androlla espérate.