O Monbus Obradoiro reafirma o seu bo inicio
O Monbus Obradoiro sumou a segunda vitoria da tempada na súa visita á pista do BAXI Manresa (76-80) despois dun intenso partido que se decidiu nos instantes finais. Con dous triunfos noutros tantos partidos disputados, o conxunto obradoirista mantense como líder da Liga Endesa.
Comezaron máis acertados os santiagueses, anotando os tres primeiros lanzamentos e tomando vantaxe no partido. Birutis e Beliauskas foron as referencias ofensivas nun parcial de dominio alterno (15-21).
O xogo comezou moi trabado no inicio do segundo cuarto. Os dous equipos apostaron polo ataque e nese contexto saíu beneficiado o conxunto local, que recortou distancias. Tres tiros libres de Robertson mantiveron ao Monbus Obradoiro por diante no marcador (39-41).
Tras o descanso, o equipo dirixido por Moncho Fernández puxo terra polo medio cun parcial de 0-9 que ampliou a súa vantaxe. Os locais, tras o tempo morto solicitado polo seu adestrador, responderon coa mesma moeda para deixar todo por decidir (56-60).
Do mesmo xeito que no resto do partido, o Monbus Obradoiro arrincou de maneira intensa o último cuarto. Iso permitiulle despegarse de novo no tenteo. O conxunto manresano non se rendeu e traballou na remontada. Logrou empatar o partido a falta de dous minutos para a conclusión, pero nos instantes finais o acerto na defensa trouxo o triunfo para Santiago de Compostela.