O Monbus Obradoiro cae ante o Real Madrid
O Monbus Obradoiro non puido facerse coa vitoria na súa visita ao Wizink Center, onde caeu ante o Real Madrid por 94 a 70. A pesar da ampla vantaxe final, o conxunto dirixido por Moncho Fernández foise coa cabeza alta despois de pelexar ata o final ante o todopoderoso conxunto branco.
Xa desde o inicio o Monbus Obradoiro mostraría a que sería o seu mellor arma no partido, o triplo. Ben Simons e Kyle Singler foron os encargados de abrir a billa anotando os dous primeiros dos seis triplos que o seu equipo convertería no primeiro cuarto (20-22).
O encontro seguiu por un camiño igualado no que as diferenzas no resultado eran mínimas. Tan só un tiro de tres de Rudy Fernández nos últimos compases evitou que o Monbus Obradoiro se fose ao descanso por diante no marcador (45-43).
Á volta de vestiarios, os visitantes parecían saír enchufados despois de que Ben Simons aparecese de novo desde o triplo para abrir o tanteo. Foi un espellismo. A partir de aí, os madridistas decantaron o partido ao seu favor cun gran parcial (71-56).
O Real Madrid pisou o acelerador e o Monbus Obradoiro respondeu cun intento por recortar distancias. Con todo, o desacerto no tiro e a defensa branca cortaron a reacción. Maxime de Zeeuw protagonizou a ofensiva obradoirista con 10 puntos no último cuarto.
Tras o desprazamento a Madrid, a Liga Endesa volve esta semana ao Multiusos Fontes do Sar. O Montakit Fuenlabrada visita Santiago (sábado 20 de abril ás 20:30 horas) nun duelo crave pola permanencia.