Monbus na Supercopa Endesa 2018
Santiago acolleu a Supercopa Endesa 2018 co Monbus Obradoiro de excelente anfitrión. Foi unha cita con gran éxito de participación na que o Real Madrid acabou coroándose campión. Kirolbet Baskonia e Barcelona Lassa completaron o cadro de competidores que durante dous emocionantes días fixeron as delicias do público santiagués.
Monbus formou parte activamente do evento sendo o medio de transporte elixido polos equipos participantes para moverse por Santiago. Así, Monbus encargouse de realizar o traslado das diferentes expedicións desde o aeroporto ao seu hotel de concentración e tamén dos seus desprazamentos ata o Multiusos Fontes do Sar para adestrar e disputar os seus partidos.
Espectáculo na pista
A primeira semifinal enfrontou a Barcelona Lassa e Kirolbet Baskonia. Os vascos, liderados por Shavon Shields e Patricio Garino, levaron a dianteira durante todo o partido chegando a dispoñer dunha vantaxe de 20 puntos. O equipo barcelonista non tirou a toalla e chegou con vida aos instantes finais, onde tivo a posesión para mandar o partido á prórroga. Na xogada decisiva o triplo de Kyle Kuric non entrou e o conxunto baskonista pasou á final (76-79).
A continuación saltaron á pista o Monbus Obradoiro e o Real Madrid. Os madridistas partían como favoritos pero o equipo local, arroupado pola súa afección, non llo ía a poñer fácil. Tras unha intensa primeira parte, o Real Madrid rompeu o partido no terceiro cuarto cun Sergio Llull decisivo. O balear encargouse de selar o pase á final con 17 puntos e 6 asistencias. A pesar das adversidades, o Monbus Obradoiro non baixou os brazos e encabezado por Kostas Vasileiadis e Albert Sàbat logrou pechar o partido con orgullo (61-81).
Real Madrid, campión por quinta vez
Na final, Real Madrid e Kirolbet Baskonia disputaron un partido moi igualado no que todo se decidiu nos últimos minutos. Os brancos sufriron ante o conxunto vasco pero ao final acabaron conquistando a quinta Supercopa da súa historia (80-73).
O éxito da cita quedou plasmado cun Multiusos Fontes do Sar cheo ata a bandeira que gozou dunha dobre sesión do mellor baloncesto. O Monbus Obradoiro gozou ante un público entregado que viu como o seu equipo deixaba o pavillón alto na súa primeira participación na Supercopa.