Monbus celebra o Día sen Coches
Monbus únese á celebración do Día sen Coches poñendo a disposición dos seus usuarios o transporte urbano gratuíto en Ferrol, Talavera de la Reina e Lugo. En Ferrol os viaxeiros poderán acceder ao servizo gratuitamente durante a xornada do venres 21 mentres que en Talavera de la Reina e Lugo o día elixido para a celebración será o sábado 22.
As tres cidades quixeron unirse a este proxecto que se enmarca dentro da Semana Europea da Mobilidade, unha iniciativa europea que serve para introducir e promover nas cidades medidas de transporte sustentable alternativas ao uso do automóbil.
Durante todo o día, varias zonas urbanas pecharanse ao tráfico motorizado e estableceranse zonas peonís e realizaranse actividades ao aire libre, sendo o transporte público a maneira máis inmediata e eficaz de desprazarse.
Á marxe do aspecto lúdico, a xornada ten o obxectivo de fomentar o uso de transporte público que, entre outras, conta coas vantaxes do aproveitamento do tempo, o aforro de tempo e diñeiro e a conservación do medio ambiente. Todo iso repercute nunha mellor calidade de vida para todos.