O Río Natura Monbus comeza o ano cunha vitoria.
O Multiusos Fontes do Sar volve a ser o fortín dun Obradoiro que viña de sufrir cinco derrotas consecutivas e que, no entanto, estreou con bo pé o novo ano, conseguindo unha vitoria épica na prórroga, fronte a un Morabanc Andorra que en ningún momento se amedrentou polo ambiente do Sar. Ademais, o Río Natura Monbus Obradoiro bateu o seu récord de triples nun partido, xa que de 34 intentos anotou 20 triples, o que supón un 59% de acertos, superando de este modo o seu propio récord e igualando o absoluto da Liga Endesa.
Os de Moncho Fernández saíron a gañar desde o primeiro cuarto, a pesar de que Vojdan Stojanovski tratase de frear os embates dos locais, liderados pola figura de Adam Waczynski, que puxo á afección en pé en moitos momentos do partido, con canastras que a posteriori serían determinantes no resultado final.
Porén, o equipo andorrano, da man de Stojanovski e Shermadini, deu a volta ao marcador no terceiro tempo (80-83).
En palabras de Moncho Fernández: “No último cuarto, cando nos puxeron defensa en zona, creo que nos pesaron esas cinco derrotas consecutivas. Fomos capaces de xerar esas vantaxes, o que non fomos capaces foi de anotalas”
Tras unha vibrante prórroga (88-88), Waczynski conseguiu a canastra que certificaría o triunfo dos locais, nun partido non apto para cardíacos (104-103) que tivo en pé aos Obradoiristas das bancadas, máis unidos ca nunca en #ocamiñodailusion.