Aforra nas túas viaxes coa TMG
A Tarxeta Metropolitana de Galicia (TMG) é unha tarxeta moedeiro destinada a pagar o importe do billete nos servizos do Plan de Transporte de Galicia. A persoa usuaria carga a súa tarxeta co importe que desexe e de aí vaise descontando o prezo das viaxes que vaia realizando.
O pago coa TMG realízase no propio autobús, non é posible efectualo na taquilla. Con carácter xeral, esta tarxeta non ten carácter personal, polo que poderá ser utilizada indistintamente por calquera persoa. Con ela tamén é posible pagar a viaxe de varias persoas que viaxen xuntas.
Adquisición
A Tarxeta Metropolitana de Galicia adquírese nas oficinas de ABANCA e ten un custo de 2 euros. Este medio de pago pódese cargar cun máximo de 180 euros sempre con cantidades múltiplos de 5 euros e sen superar os 60 euros diarios de recarga.
Bonificacións
A TMG ofrece diferentes tarifas e descontos ás persoas usuarias en función de se o traxecto realizado está dentro ou fora dalgunha das Áreas de Transporte Metropolitano (ATM) de Galicia.
Dentro de Área Metropolitana: traxectos con orixe e destino dentro dunha mesma área. Por exemplo, unha viaxe entre Nigrán e Baiona estaría dentro da Área de Transporte Metropolitano de Vigo. En función do número de saltos da viaje establecéronse as seguintes tarifas:
- Urbano Lugo: 0,45€
- Urbano Santiago: 0,60€
- Urbano A Coruña: 0,75€
- 0-1 saltos: 0,88€
- 2 saltos: 1,34€
- 3 saltos: 1,90€
- 4 saltos: 2,31€
- 5 saltos: 3,22€
- 6 saltos: 3,78€
- 7 saltos: 4,20€
- 8 saltos: 4,65€
- 9 saltos: 5,15€
- 10 saltos: 5,68€
Fora de Área Metropolitana: traxectos con orixen e/ou destino fóra das Áreas de Transporte Metropolitano de Galicia. Utilizando a TMG nestas viaxes a persoa usuaria obtén un desconto directo do 10% no prezo do seu billete. É dicir, no momento de pasar a tarxeta pola máquina do autobús, xa paga un 10% menos polo seu billete. Ademais, tamén se aplican bonificacións por recorrencia segundo o número de viaxes realizados ao mes:
- De 1 a 20 viaxes nun mes: sen desconto
- De 21 a 40 viaxes nun mes: 25% de desconto
- Más de 40 viaxes nun mes: 50% de desconto
Por exemplo, se unha persoa realiza 43 viaxes nun mes, bonificaríase da seguinte maneira: viaxes de 1 a 20, sen desconto; viaxes de 21 a 40, reembolso posterior do 25% do billete; viaxes de 41 a 43, reembolso posterior do 50% do billete.
A finais do mes seguinte, a persoa usuaria deberá dirixirse aos caixeiros de ABANCA para recibir na súa tarxeta o importe dos descontos aplicados segundo o número de viaxes que realizara. Os descontos por recorrencia, tanto dentro como fóra da área metropolitana, non son aplicables a billetes consecutivos (unha mesma viaxe pagada coa tarxeta TMG para máis dunha persoa). Por exemplo, se viaxo cun amigo desde Vigo a Ourense e pago os dous billetes coa misma TMG, á hora de contabilizar as viaxes mensuais só contará como unha.
Outra vantaxe que presenta esta tarxeta é a bonificación por trasbordo. En función do número de saltos da súa viaxe a persoa usuaria disporá dun tempo determinado para facer trasbordo bonificado:
- 0 - 1 saltos: 60 minutos
- 2 saltos: 75 minutos
- 3 ou máis saltos: 90 minutos