Monbus

A permanencia está máis preto para o Monbus Obradoiro despois de conseguir na pista do Morabanc Andorra a duodécima vitoria da tempada (93-96). Matt Thomas liderou o triunfo do conxunto santiagués con 30 puntos que lle serviron para coarse entre os mellores da xornada coa súa mellor marca anotadora na Liga Endesa.

Nun inicio prometedor, o Monbus Obradoiro saíu con máis intensidade que o seu rival e o seu acerto no tiro permitiulle gozar dunha vantaxe de oito puntos. Con todo, os andorranos foron aos poucos entrando no partido grazas aos lanzamentos de longa distancia e ao final do primeiro cuarto xa mandaban no marcador (26-25).

O triplo co que o conxunto local inaugurou o tenteo do segundo cuarto parecía premonitorio do que sucedería a continuación. As diferenzas ampliáronse despois duns minutos cargados de alternativas nos que o Monbus Obradoiro resistiu e mantívose de cheo na pelexa polo triunfo (56-48).

Tras o paso por vestiarios, os de Moncho Fernández comezaron a tomar a iniciativa no xogo. Artem Pustovyi e Nemanja Radovic facían dano no xogo interior e desde fóra era Ben Simons o que reducía a vantaxe. O aleiro norteamericano empatou o partido a 72 no tramo final do terceiro cuarto cunha canastra de tres e levou o partido a un emocionante desenlace (77-74).

A igualdade seguiu sendo a nota predominante do partido no último cuarto. A falta de sete minutos para o final, o Monbus Obradoiro perdeu por lesión a Nacho Llovet, pero este contratempo non afectou aos xogadores do equipo compostelán. Souberon sobrepoñerse para xogar con destreza nos compases decisivos e amarraron a vitoria que lles achega ao obxectivo de continuar unha tempada máis entre os mellores do baloncesto nacional.

O Monbus Obradoiro afronta agora dous partidos seguidos ante a súa afección nos que pode certificar matematicamente a permanencia. Na xornada 31 recibirá ao RETAbet Bilbao Basket (sábado 5 ás 19:00 horas) e na xornada 32 será o Real Betis Energía Plus o que visite o Multiusos Fontes do Sar (sábado 12 ás 19:00 horas).